នាយករដ្ឋមន្ត្រីកម្ពុជា សម្ដេចតេជោ ហ៊ុន សែន និងក្រុមគ្រួសារបានរៀបចំពិធីខួបកំណើតគម្រប់ខួប៦៨ឆ្នាំមួយជូនដល់សម្ដេចកិត្តិព្រឹទ្ធិបណ្ឌិត ប៊ុន រ៉ានី ហ៊ុនសែន និងបានជូនពរដល់សម្ដេចកិត្តិព្រឹទ្ធិបណ្ឌិតជួបតែសេចក្ដីសុខនិងស្រលាញ់សម្ដេចតេជោឱ្យបានច្រើន។
បើទោះបីរវល់នឹងកិច្ចការប្រទេសជាតិក៏សម្ដេចតេជោ មិនភ្លេចនោះទេនូវខួបកំណើតរបស់ភរិយាសម្ដេច។ ជាក់ស្ដែងនៅល្ងាចថ្ងៃទី១៥ ខែធ្នូ ឆ្នាំ២០២១នេះ សម្ដេចតេជោ ហ៊ុន សែន បានបង្ហោះរូបថតចំនួន៨សន្លឹកដែលបានបង្ហាញនូវការរៀបចំពិធីខួបកំណើតជូនសម្ដេចកត្តិព្រឹទ្ធិបណ្ឌិតដែលរៀបចំដោយសម្ដេចនិងកូនចៅជូនចំពោះសម្ដេចកិត្តិព្រឹទ្ធិបណ្ឌិត ប៊ុន រ៉ានី ហ៊ុនសែន។
ជាមួយគ្នានោះសម្ដេចបានសរសេរថា៖ «ថ្ងៃនេះខួបកំណើតភរិយាឈានចូល៦៨ឆ្នាំ។ ជូនពរប្រពន្ធសម្លាញ់ជួបតែសេចក្តីសុខនិងស្រឡាញ់ប្តីឱ្យបានច្រើន» ។
ជាងនេះទៅទៀតសម្ដេចតេជោក៏បានបង្ហោះបទចម្រៀងមួយបទដើម្បីអបអរក្នុងថ្ងៃកំណើតរបស់សម្ដេចកិត្តិព្រឹទ្ធបណ្ឌិតផងដែរ ដែលមានចំណងជើងថា៖ «១៥ ធ្នូ អបអរសាទរថ្ងៃកំណើតសម្ដេចកិត្តិព្រឹទ្ធិបណ្ឌិត ប៊ុន រ៉ានី» ដែលបានរំលេចពីសកម្មភាពរបស់សម្ដេចកិត្តិព្រឹទ្ធបណ្ឌិតដែលបានចូលរួមលើកស្ទួយសកម្មភាពមនុស្សធម៌នៅកម្ពុជាផងដែរ។
សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន កើតនៅថ្ងៃទី១៥ ខែធ្នូ ឆ្នាំ១៩៥៤ ជាកូនកសិករក្នុងឃុំរកាខ្នុរ ស្រុកក្រូចឆ្មា ខេត្តកំពង់ចាម (បច្ចុប្បន្នជាផ្នែកនៃខេត្តត្បូងឃ្មុំ)។ សម្ដេចបានរៀបអាពាហ៍ពិពាហ៍ជាមួយសម្ដេចតេជោ ហ៊ុន សែន នាថ្ងៃទី៥ ខែមករា ឆ្នាំ១៩៧៦ ក្នុងរបបកម្ពុជាប្រជាធិបតេយ្យ។
សម្ដេចបានក្លាយជាប្រធានកាកបាទក្រហមកម្ពុជានៅថ្ងៃទី៣០ ខែមេសា ឆ្នាំ១៩៩៨ ដែលបានបន្តបេសកម្មមនុស្សធម៌ជួយដល់ពលរដ្ឋកម្ពុជារហូតមកដល់បច្ចុប្បន្ន៕
